लक्ष्मीकांत मुकुल की एक लंबी भोजपुरी कविता {देवनागरी लिपि व कैथी लिपि में रूपांतरित भी}

(भोजपुरी कविता)         

भरकी में चहुपल भईंसा /लक्ष्मीकांत मुकुल

( l )

आवेले ऊ भरकी से

कीच -पांक में गोड लसराइल

आर – डंड़ार प धावत चउहदी

हाथ में पोरसा भ के गोजी थमले

इहे पहचान रहल बा उनकर सदियन से

तलफत घाम में चियार लेखा फाट जाला

उनका खेतन के छाती

पनचहल होते हर में नधाइल बैलहाटा के

बर्धन के भंसे लागेला ठेहून

ट्रेक्टर के पहिया फंस के

लेवाड़ मारेले हीक भ

करईल के चिमर माटी चमोर देले

उखमंजलन के हाँक – दाब

हेठार खातिर दखिनहा, बाल के पछिमहा

भरकी के वासी मंगनचन ना होखे दउरा लेके कबो

बोअनी के बाद हरियरी, बियाछत पउधा के सोरी के

पूजत रहे के बा उनकर आदिये के सोभाव

जांगर ठेठाई धरती से उपराज लेलन सोना

माटी का आन, मेहनत के पेहान के मानले जीये के मोल

( ll )

शहर के सड़की पर अबो

ना चले आइल उनका दायें – बायें

मांड़ – भात खाए के आदी के रेस्तरां में

इडली – डोसा चीखे के ना होखल अब ले सहूर

उनकर लार चुवे लागेला

मरदुआ – रिकवंछ ढकनेसर के नांव प

सोस्ती सीरी वाली चिट्ठी बांचत मनईं

न बुझ पावल अबले इमेल – उमेल के बात

कउड़ा त बइठ के गँवलेहर करत

अभियो गंवार बन के चकचिहाइल रहेले

सभ्य लोगन के सामने बिलार मतिन

गोल – मोल – तोल के टेढ़बाँगुच

लीक का भरोसे अब तक नापे न आइल

उनका आगे बढे के चाह

माँल  में चमकऊआ लुग्गा वाली मेहरारू

कबो न लुझेलीसन उनका ओर

कवलेजिहा लइकी मोबाईल प अंगुरी फेरत चोन्हा में

कनखी से उनका ओर बिरावेलीसन मुंह

अंग्रेजी में किड़बिड़ बोलत इसकोलिहा बाचा

उनका के झपिलावत बुझेलसन दोसरा गरह के बसेना

शहरीन के नजर में ऊ लागेलन गोबरउरा अस

उनका के देखते छूछ्बेहर सवखिनिहाँ के मन में भभके लागेला

घूर के बास , गोठहुल के भकसी, भुसहुल के भकसी

( lll )

जब ले बहल बा बजरुहा बयार

धूर लेखा उधिया रहल बा भरकी के गाँव, ओकर चिन्हानी

खेत – बधार , नदी – घाट , महुआ – पाकड़

बिकुआ जींस मतीन घूम रहल बाड़ीसन मंडी के मोहानी प

जहवाँ पोखरी के गरइ मछरी के चहुपता खेप

चहुपावल जा रहल बा दूध भरल डिब्बा

गोड़ार के उप्रजल तियना

खरिहान में चमकत धान, बकेन, दुधगर देसिला गरु के देसावर

समय के सउदागर लूट रहल बा

हमनी के कूल्ह संगोरल थाती

धार मराइल बा सपना प

दिनोदिन आलोपित हो रहल बा मठमेहर अस

धनखर देस पुअरा से चिन्हइला के पहचान

मेट गइल फगुआ चइता – कजरी के सहमेल

भुला गइल खलिहा बखत हितई कमाये जाये के रेवाज

ख़तम हो रहल बा खरमेंटाव के बेरा

सतुआ खाये माठा घोंटे के बानि

छूट गइल ऊ लगन जब आदमी नरेटी से ना

ढोढ़ी के दम से ठठा के हँसत रहे जोरदार

जवानी बिलवारहल बाड़े एहीजा के नवहा

पंजाब, गुजरात, का कारखाना में देह गलावत

बूढ़ झाँख मारताड़े कुरसत ज़माना के बदलल खेल प

बढ़ता मरद के दारु, रोड प मेहरारू के चलन

लइका बहेंगवा बनल बुझा रहल बाड़ें जिये के ललसा

सूअर के खोभार अस बन रहल बा गाँव – गली

कमजोर हो रहल बा माटी के जकडल रहे के

घुड़ली घास ,बेंगची, भरकभांड़ के जड़न के हूब.

(IV)

दिनदुपहरिये गाँव के मटीगर देवाल में

सेंध फोरत ढुक गईल बा शहर

कान्ही प लदले बाज़ार

पीठी प लदले विकास के झुझुना

कपार प टंगले सरकारी घिरनई

अंकवारी में लिहले अमेरिकी दोकान

एह नया अवतार प अचंभों में

पडल बा गाँव भरकी के

ना हेठारो के ना पूरा दुनिया – जहान के

जइसे सोझा पड़ गईल होखे मरखाहवा भईंसा

भागल जाव कि भगावल जाव ओके सिवान से

भकसावन अन्हरिया रात में लुकार बान्ह के.

कैथी लिपि में रूपांतरित_

𑂦𑂩𑂍𑂲 𑂧𑂵𑂁 𑂒𑂯𑂳𑂣𑂪 𑂦𑂆𑂁𑂮𑂰 /𑂪𑂍𑂹𑂭𑂹𑂧𑂲𑂍𑂰𑂁𑂞 𑂧𑂳𑂍𑂳𑂪


( l )

𑂄𑂫𑂵𑂪𑂵 𑂈 𑂦𑂩𑂍𑂲 𑂮𑂵

𑂍𑂲𑂒 -𑂣𑂰𑂁𑂍 𑂧𑂵𑂁 𑂏𑂷𑂚 𑂪𑂮𑂩𑂰𑂅𑂪

𑂄𑂩 – 𑂙𑂁𑂚𑂰𑂩 𑂣 𑂡𑂰𑂫𑂞 𑂒𑂇𑂯𑂠𑂲

𑂯𑂰𑂟 𑂧𑂵𑂁 𑂣𑂷𑂩𑂮𑂰 𑂦 𑂍𑂵 𑂏𑂷𑂔𑂲 𑂟𑂧𑂪𑂵

𑂅𑂯𑂵 𑂣𑂯𑂒𑂰𑂢 𑂩𑂯𑂪 𑂥𑂰 𑂇𑂢𑂍𑂩 𑂮𑂠𑂱𑂨𑂢 𑂮𑂵

𑂞𑂪𑂤𑂞 𑂐𑂰𑂧 𑂧𑂵𑂁 𑂒𑂱𑂨𑂰𑂩 𑂪𑂵𑂎𑂰 𑂤𑂰𑂗 𑂔𑂰𑂪𑂰

𑂇𑂢𑂍𑂰 𑂎𑂵𑂞𑂢 𑂍𑂵 𑂓𑂰𑂞𑂲

𑂣𑂢𑂒𑂯𑂪 𑂯𑂷𑂞𑂵 𑂯𑂩 𑂧𑂵𑂁 𑂢𑂡𑂰𑂅𑂪 𑂥𑂶𑂪𑂯𑂰𑂗𑂰 𑂍𑂵

𑂥𑂩𑂹𑂡𑂢 𑂍𑂵 𑂦𑂁𑂮𑂵 𑂪𑂰𑂏𑂵𑂪𑂰 𑂘𑂵𑂯𑂴𑂢

𑂗𑂹𑂩𑂵𑂍𑂹𑂗𑂩 𑂍𑂵 𑂣𑂯𑂱𑂨𑂰 𑂤𑂁𑂮 𑂍𑂵

𑂪𑂵𑂫𑂰𑂚 𑂧𑂰𑂩𑂵𑂪𑂵 𑂯𑂲𑂍 𑂦

𑂍𑂩𑂆𑂪 𑂍𑂵 𑂒𑂱𑂧𑂩 𑂧𑂰𑂗𑂲 𑂒𑂧𑂷𑂩 𑂠𑂵𑂪𑂵

𑂇𑂎𑂧𑂁𑂔𑂪𑂢 𑂍𑂵 𑂯𑂰𑂀𑂍 – 𑂠𑂰𑂥

𑂯𑂵𑂘𑂰𑂩 𑂎𑂰𑂞𑂱𑂩 𑂠𑂎𑂱𑂢𑂯𑂰, 𑂥𑂰𑂪 𑂍𑂵 𑂣𑂓𑂱𑂧𑂯𑂰

𑂦𑂩𑂍𑂲 𑂍𑂵 𑂫𑂰𑂮𑂲 𑂧𑂁𑂏𑂢𑂒𑂢 𑂢𑂰 𑂯𑂷𑂎𑂵 𑂠𑂇𑂩𑂰 𑂪𑂵𑂍𑂵 𑂍𑂥𑂷

𑂥𑂷𑂃𑂢𑂲 𑂍𑂵 𑂥𑂰𑂠 𑂯𑂩𑂱𑂨𑂩𑂲, 𑂥𑂱𑂨𑂰𑂓𑂞 𑂣𑂇𑂡𑂰 𑂍𑂵 𑂮𑂷𑂩𑂲 𑂍𑂵

𑂣𑂴𑂔𑂞 𑂩𑂯𑂵 𑂍𑂵 𑂥𑂰 𑂇𑂢𑂍𑂩 𑂄𑂠𑂱𑂨𑂵 𑂍𑂵 𑂮𑂷𑂦𑂰𑂫

𑂔𑂰𑂁𑂏𑂩 𑂘𑂵𑂘𑂰𑂆 𑂡𑂩𑂞𑂲 𑂮𑂵 𑂇𑂣𑂩𑂰𑂔 𑂪𑂵𑂪𑂢 𑂮𑂷𑂢𑂰

𑂧𑂰𑂗𑂲 𑂍𑂰 𑂄𑂢, 𑂧𑂵𑂯𑂢𑂞 𑂍𑂵 𑂣𑂵𑂯𑂰𑂢 𑂍𑂵 𑂧𑂰𑂢𑂪𑂵 𑂔𑂲𑂨𑂵 𑂍𑂵 𑂧𑂷𑂪


( ll )

𑂬𑂯𑂩 𑂍𑂵 𑂮𑂚𑂍𑂲 𑂣𑂩 𑂃𑂥𑂷

𑂢𑂰 𑂒𑂪𑂵 𑂄𑂅𑂪 𑂇𑂢𑂍𑂰 𑂠𑂰𑂨𑂵𑂁 – 𑂥𑂰𑂨𑂵𑂁

𑂧𑂰𑂁𑂚 – 𑂦𑂰𑂞 𑂎𑂰𑂉 𑂍𑂵 𑂄𑂠𑂲 𑂍𑂵 𑂩𑂵𑂮𑂹𑂞𑂩𑂰𑂁 𑂧𑂵𑂁

𑂅𑂙𑂪𑂲 – 𑂙𑂷𑂮𑂰 𑂒𑂲𑂎𑂵 𑂍𑂵 𑂢𑂰 𑂯𑂷𑂎𑂪 𑂃𑂥 𑂪𑂵 𑂮𑂯𑂴𑂩

𑂇𑂢𑂍𑂩 𑂪𑂰𑂩 𑂒𑂳𑂫𑂵 𑂪𑂰𑂏𑂵𑂪𑂰

𑂧𑂩𑂠𑂳𑂄 – 𑂩𑂱𑂍𑂫𑂁𑂓 𑂛𑂍𑂢𑂵𑂮𑂩 𑂍𑂵 𑂢𑂰𑂁𑂫 𑂣

𑂮𑂷𑂮𑂹𑂞𑂲 𑂮𑂲𑂩𑂲 𑂫𑂰𑂪𑂲 𑂒𑂱𑂗𑂹𑂘𑂲 𑂥𑂰𑂁𑂒𑂞 𑂧𑂢𑂆𑂁

𑂢 𑂥𑂳𑂕 𑂣𑂰𑂫𑂪 𑂃𑂥𑂪𑂵 𑂅𑂧𑂵𑂪 – 𑂇𑂧𑂵𑂪 𑂍𑂵 𑂥𑂰𑂞

𑂍𑂇𑂚𑂰 𑂞 𑂥𑂅𑂘 𑂍𑂵 𑂏𑂀𑂫𑂪𑂵𑂯𑂩 𑂍𑂩𑂞

𑂃𑂦𑂱𑂨𑂷 𑂏𑂁𑂫𑂰𑂩 𑂥𑂢 𑂍𑂵 𑂒𑂍𑂒𑂱𑂯𑂰𑂅𑂪 𑂩𑂯𑂵𑂪𑂵

𑂮𑂦𑂹𑂨 𑂪𑂷𑂏𑂢 𑂍𑂵 𑂮𑂰𑂧𑂢𑂵 𑂥𑂱𑂪𑂰𑂩 𑂧𑂞𑂱𑂢

𑂏𑂷𑂪 – 𑂧𑂷𑂪 – 𑂞𑂷𑂪 𑂍𑂵 𑂗𑂵𑂜𑂥𑂰𑂀𑂏𑂳𑂒

𑂪𑂲𑂍 𑂍𑂰 𑂦𑂩𑂷𑂮𑂵 𑂃𑂥 𑂞𑂍 𑂢𑂰𑂣𑂵 𑂢 𑂄𑂅𑂪

𑂇𑂢𑂍𑂰 𑂄𑂏𑂵 𑂥𑂛𑂵 𑂍𑂵 𑂒𑂰𑂯

𑂧𑂰𑂀𑂪 𑂧𑂵𑂁 𑂒𑂧𑂍𑂈𑂄 𑂪𑂳𑂏𑂹𑂏𑂰 𑂫𑂰𑂪𑂲 𑂧𑂵𑂯𑂩𑂰𑂩𑂴

𑂍𑂥𑂷 𑂢 𑂪𑂳𑂕𑂵𑂪𑂲𑂮𑂢 𑂇𑂢𑂍𑂰 𑂋𑂩

𑂍𑂫𑂪𑂵𑂔𑂱𑂯𑂰 𑂪𑂅𑂍𑂲 𑂧𑂷𑂥𑂰𑂆𑂪 𑂣 𑂃𑂁𑂏𑂳𑂩𑂲 𑂤𑂵𑂩𑂞 𑂒𑂷𑂢𑂹𑂯𑂰 𑂧𑂵𑂁

𑂍𑂢𑂎𑂲 𑂮𑂵 𑂇𑂢𑂍𑂰 𑂋𑂩 𑂥𑂱𑂩𑂰𑂫𑂵𑂪𑂲𑂮𑂢 𑂧𑂳𑂁𑂯

𑂃𑂁𑂏𑂹𑂩𑂵𑂔𑂲 𑂧𑂵𑂁 𑂍𑂱𑂚𑂥𑂱𑂚 𑂥𑂷𑂪𑂞 𑂅𑂮𑂍𑂷𑂪𑂱𑂯𑂰 𑂥𑂰𑂒𑂰

𑂇𑂢𑂍𑂰 𑂍𑂵 𑂕𑂣𑂱𑂪𑂰𑂫𑂞 𑂥𑂳𑂕𑂵𑂪𑂮𑂢 𑂠𑂷𑂮𑂩𑂰 𑂏𑂩𑂯 𑂍𑂵 𑂥𑂮𑂵𑂢𑂰

𑂬𑂯𑂩𑂲𑂢 𑂍𑂵 𑂢𑂔𑂩 𑂧𑂵𑂁 𑂈 𑂪𑂰𑂏𑂵𑂪𑂢 𑂏𑂷𑂥𑂩𑂇𑂩𑂰 𑂃𑂮

𑂇𑂢𑂍𑂰 𑂍𑂵 𑂠𑂵𑂎𑂞𑂵 𑂓𑂴𑂓𑂹𑂥𑂵𑂯𑂩 𑂮𑂫𑂎𑂱𑂢𑂱𑂯𑂰𑂀 𑂍𑂵 𑂧𑂢 𑂧𑂵𑂁 𑂦𑂦𑂍𑂵 𑂪𑂰𑂏𑂵𑂪𑂰

𑂐𑂴𑂩 𑂍𑂵 𑂥𑂰𑂮 , 𑂏𑂷𑂘𑂯𑂳𑂪 𑂍𑂵 𑂦𑂍𑂮𑂲, 𑂦𑂳𑂮𑂯𑂳𑂪 𑂍𑂵 𑂦𑂍𑂮𑂲

( lll )

𑂔𑂥 𑂪𑂵 𑂥𑂯𑂪 𑂥𑂰 𑂥𑂔𑂩𑂳𑂯𑂰 𑂥𑂨𑂰𑂩

𑂡𑂴𑂩 𑂪𑂵𑂎𑂰 𑂇𑂡𑂱𑂨𑂰 𑂩𑂯𑂪 𑂥𑂰 𑂦𑂩𑂍𑂲 𑂍𑂵 𑂏𑂰𑂀𑂫, 𑂋𑂍𑂩 𑂒𑂱𑂢𑂹𑂯𑂰𑂢𑂲

𑂎𑂵𑂞 – 𑂥𑂡𑂰𑂩 , 𑂢𑂠𑂲 – 𑂐𑂰𑂗 , 𑂧𑂯𑂳𑂄 – 𑂣𑂰𑂍𑂚

𑂥𑂱𑂍𑂳𑂄 𑂔𑂲𑂁𑂮 𑂧𑂞𑂲𑂢 𑂐𑂴𑂧 𑂩𑂯𑂪 𑂥𑂰𑂚𑂲𑂮𑂢 𑂧𑂁𑂙𑂲 𑂍𑂵 𑂧𑂷𑂯𑂰𑂢𑂲 𑂣

𑂔𑂯𑂫𑂰𑂀 𑂣𑂷𑂎𑂩𑂲 𑂍𑂵 𑂏𑂩𑂆 𑂧𑂓𑂩𑂲 𑂍𑂵 𑂒𑂯𑂳𑂣𑂞𑂰 𑂎𑂵𑂣

𑂒𑂯𑂳𑂣𑂰𑂫𑂪 𑂔𑂰 𑂩𑂯𑂪 𑂥𑂰 𑂠𑂴𑂡 𑂦𑂩𑂪 𑂙𑂱𑂥𑂹𑂥𑂰

𑂏𑂷𑂚𑂰𑂩 𑂍𑂵 𑂇𑂣𑂹𑂩𑂔𑂪 𑂞𑂱𑂨𑂢𑂰

𑂎𑂩𑂱𑂯𑂰𑂢 𑂧𑂵𑂁 𑂒𑂧𑂍𑂞 𑂡𑂰𑂢, 𑂥𑂍𑂵𑂢, 𑂠𑂳𑂡𑂏𑂩 𑂠𑂵𑂮𑂱𑂪𑂰 𑂏𑂩𑂳 𑂍𑂵 𑂠𑂵𑂮𑂰𑂫𑂩

𑂮𑂧𑂨 𑂍𑂵 𑂮𑂇𑂠𑂰𑂏𑂩 𑂪𑂴𑂗 𑂩𑂯𑂪 𑂥𑂰

𑂯𑂧𑂢𑂲 𑂍𑂵 𑂍𑂴𑂪𑂹𑂯 𑂮𑂁𑂏𑂷𑂩𑂪 𑂟𑂰𑂞𑂲

𑂡𑂰𑂩 𑂧𑂩𑂰𑂅𑂪 𑂥𑂰 𑂮𑂣𑂢𑂰 𑂣

𑂠𑂱𑂢𑂷𑂠𑂱𑂢 𑂄𑂪𑂷𑂣𑂱𑂞 𑂯𑂷 𑂩𑂯𑂪 𑂥𑂰 𑂧𑂘𑂧𑂵𑂯𑂩 𑂃𑂮

𑂡𑂢𑂎𑂩 𑂠𑂵𑂮 𑂣𑂳𑂃𑂩𑂰 𑂮𑂵 𑂒𑂱𑂢𑂹𑂯𑂅𑂪𑂰 𑂍𑂵 𑂣𑂯𑂒𑂰𑂢

𑂧𑂵𑂗 𑂏𑂅𑂪 𑂤𑂏𑂳𑂄 𑂒𑂅𑂞𑂰 – 𑂍𑂔𑂩𑂲 𑂍𑂵 𑂮𑂯𑂧𑂵𑂪

𑂦𑂳𑂪𑂰 𑂏𑂅𑂪 𑂎𑂪𑂱𑂯𑂰 𑂥𑂎𑂞 𑂯𑂱𑂞𑂆 𑂍𑂧𑂰𑂨𑂵 𑂔𑂰𑂨𑂵 𑂍𑂵 𑂩𑂵𑂫𑂰𑂔

𑂎𑂺𑂞𑂧 𑂯𑂷 𑂩𑂯𑂪 𑂥𑂰 𑂎𑂩𑂧𑂵𑂁𑂗𑂰𑂫 𑂍𑂵 𑂥𑂵𑂩𑂰

𑂮𑂞𑂳𑂄 𑂎𑂰𑂨𑂵 𑂧𑂰𑂘𑂰 𑂐𑂷𑂁𑂗𑂵 𑂍𑂵 𑂥𑂰𑂢𑂱

𑂓𑂴𑂗 𑂏𑂅𑂪 𑂈 𑂪𑂏𑂢 𑂔𑂥 𑂄𑂠𑂧𑂲 𑂢𑂩𑂵𑂗𑂲 𑂮𑂵 𑂢𑂰

𑂛𑂷𑂜𑂲 𑂍𑂵 𑂠𑂧 𑂮𑂵 𑂘𑂘𑂰 𑂍𑂵 𑂯𑂀𑂮𑂞 𑂩𑂯𑂵 𑂔𑂷𑂩𑂠𑂰𑂩

𑂔𑂫𑂰𑂢𑂲 𑂥𑂱𑂪𑂫𑂰𑂩𑂯𑂪 𑂥𑂰𑂚𑂵 𑂉𑂯𑂲𑂔𑂰 𑂍𑂵 𑂢𑂫𑂯𑂰

𑂣𑂁𑂔𑂰𑂥, 𑂏𑂳𑂔𑂩𑂰𑂞, 𑂍𑂰 𑂍𑂰𑂩𑂎𑂰𑂢𑂰 𑂧𑂵𑂁 𑂠𑂵𑂯 𑂏𑂪𑂰𑂫𑂞

𑂥𑂴𑂜 𑂕𑂰𑂀𑂎 𑂧𑂰𑂩𑂞𑂰𑂚𑂵 𑂍𑂳𑂩𑂮𑂞 𑂔𑂺𑂧𑂰𑂢𑂰 𑂍𑂵 𑂥𑂠𑂪𑂪 𑂎𑂵𑂪 𑂣

𑂥𑂜𑂞𑂰 𑂧𑂩𑂠 𑂍𑂵 𑂠𑂰𑂩𑂳, 𑂩𑂷𑂙 𑂣 𑂧𑂵𑂯𑂩𑂰𑂩𑂴 𑂍𑂵 𑂒𑂪𑂢

𑂪𑂅𑂍𑂰 𑂥𑂯𑂵𑂁𑂏𑂫𑂰 𑂥𑂢𑂪 𑂥𑂳𑂕𑂰 𑂩𑂯𑂪 𑂥𑂰𑂚𑂵𑂁 𑂔𑂱𑂨𑂵 𑂍𑂵 𑂪𑂪𑂮𑂰

𑂮𑂴𑂃𑂩 𑂍𑂵 𑂎𑂷𑂦𑂰𑂩 𑂃𑂮 𑂥𑂢 𑂩𑂯𑂪 𑂥𑂰 𑂏𑂰𑂀𑂫 – 𑂏𑂪𑂲

𑂍𑂧𑂔𑂷𑂩 𑂯𑂷 𑂩𑂯𑂪 𑂥𑂰 𑂧𑂰𑂗𑂲 𑂍𑂵 𑂔𑂍𑂙𑂪 𑂩𑂯𑂵 𑂍𑂵

𑂐𑂳𑂚𑂪𑂲 𑂐𑂰𑂮 ,𑂥𑂵𑂁𑂏𑂒𑂲, 𑂦𑂩𑂍𑂦𑂰𑂁𑂚 𑂍𑂵 𑂔𑂚𑂢 𑂍𑂵 𑂯𑂴𑂥.


(IV)

𑂠𑂱𑂢𑂠𑂳𑂣𑂯𑂩𑂱𑂨𑂵 𑂏𑂰𑂀𑂫 𑂍𑂵 𑂧𑂗𑂲𑂏𑂩 𑂠𑂵𑂫𑂰𑂪 𑂧𑂵𑂁

𑂮𑂵𑂁𑂡 𑂤𑂷𑂩𑂞 𑂛𑂳𑂍 𑂏𑂆𑂪 𑂥𑂰 𑂬𑂯𑂩

𑂍𑂰𑂢𑂹𑂯𑂲 𑂣 𑂪𑂠𑂪𑂵 𑂥𑂰𑂔𑂺𑂰𑂩

𑂣𑂲𑂘𑂲 𑂣 𑂪𑂠𑂪𑂵 𑂫𑂱𑂍𑂰𑂮 𑂍𑂵 𑂕𑂳𑂕𑂳𑂢𑂰

𑂍𑂣𑂰𑂩 𑂣 𑂗𑂁𑂏𑂪𑂵 𑂮𑂩𑂍𑂰𑂩𑂲 𑂐𑂱𑂩𑂢𑂆

𑂃𑂁𑂍𑂫𑂰𑂩𑂲 𑂧𑂵𑂁 𑂪𑂱𑂯𑂪𑂵 𑂃𑂧𑂵𑂩𑂱𑂍𑂲 𑂠𑂷𑂍𑂰𑂢

𑂉𑂯 𑂢𑂨𑂰 𑂃𑂫𑂞𑂰𑂩 𑂣 𑂃𑂒𑂁𑂦𑂷𑂁 𑂧𑂵𑂁

𑂣𑂙𑂪 𑂥𑂰 𑂏𑂰𑂀𑂫 𑂦𑂩𑂍𑂲 𑂍𑂵

𑂢𑂰 𑂯𑂵𑂘𑂰𑂩𑂷 𑂍𑂵 𑂢𑂰 𑂣𑂴𑂩𑂰 𑂠𑂳𑂢𑂱𑂨𑂰 – 𑂔𑂯𑂰𑂢 𑂍𑂵

𑂔𑂅𑂮𑂵 𑂮𑂷𑂕𑂰 𑂣𑂚 𑂏𑂆𑂪 𑂯𑂷𑂎𑂵 𑂧𑂩𑂎𑂰𑂯𑂫𑂰 𑂦𑂆𑂁𑂮𑂰

𑂦𑂰𑂏𑂪 𑂔𑂰𑂫 𑂍𑂱 𑂦𑂏𑂰𑂫𑂪 𑂔𑂰𑂫 𑂋𑂍𑂵 𑂮𑂱𑂫𑂰𑂢 𑂮𑂵

𑂦𑂍𑂮𑂰𑂫𑂢 𑂃𑂢𑂹𑂯𑂩𑂱𑂨𑂰 𑂩𑂰𑂞 𑂧𑂵𑂁 𑂪𑂳𑂍𑂰𑂩 𑂥𑂰𑂢𑂹𑂯 𑂍𑂵.